माघ २४,झापा – क्रिकेटको सबैभन्दा रोमाञ्चक प्रतियोगिता आइसिसी टी–२० विश्वकप शनिबारदेखि सुरु हुँदैछ। भारत र श्रीलङ्कामा संयुक्त रूपमा हुने प्रतियोगितामा नेपालसहित २० टोली सहभागी छन्। करिब एक महिना चल्ने प्रतियोगितामा ५५ खेल खेलिने छन्। चार समूहमा विभाजित टोलीमध्ये प्रत्येक समूहका शीर्ष दुई टोली सुपर–८ मा पुग्नेछन्।
टी–२० क्रिकेट छोटो र रोमाञ्चक स्वरूपका कारण विश्वभर लोकप्रिय छ। यही लोकप्रियताका कारण आइसिसीले यो विश्वकप प्रत्येक दुई वर्षमा आयोजना गर्दै आएको छ।
नेपाल तेस्रो पटक टी–२० विश्वकप खेल्दैछ। ओमानमा भएको छनोट जितेर नेपाल विश्वकपमा पुगेको हो। हालैको राम्रो प्रदर्शन, वेस्ट इन्डिजविरुद्ध ऐतिहासिक शृङ्खला जित तथा वार्म–अप खेलमा युएई र क्यानडामाथि जितले नेपाल आत्मविश्वासमा छ। यसपटक नेपालले सुपर–८ मा पुग्ने लक्ष्य लिएको छ।
नेपाल समूह ‘सी’ मा इङ्ग्ल्यान्ड, वेस्ट इन्डिज, स्कटल्यान्ड र इटालीसँग रहेको छ। कप्तान रोहित पौडेलले टोली अर्को चरण पुग्न सक्षम रहेको बताएका छन्। नेपाली टोलीका खेलका टिकट छिट्टै बिक्री भएकाले समर्थकको उत्साह पनि उच्च छ।
उपाधिका मुख्य दाबेदारका रूपमा भारत, इङ्ग्ल्यान्ड र अस्ट्रेलियालाई हेरिएको छ भने न्युजिल्यान्ड र दक्षिण अफ्रिका पनि बलिया प्रतिस्पर्धी हुन्।
विश्वकपअघि केही राजनीतिक र स्वास्थ्यसम्बन्धी चर्चा भए पनि अहिले सबैको ध्यान मैदानमा हुने रोमाञ्चकतर्फ केन्द्रित छ। अब हेर्न बाँकी छ — नेपालले यसपटक कति ठूलो इतिहास रच्नेछ।
