काठमाडौँ । २०७९ मंसिर ४ गते भएको निर्वाचनपछि गठित प्रतिनिधि सभा विघटन भएको छ ।
भदौ २७ गते प्रधानमन्त्री सुशीला कार्कीको सिफारिसमा राष्ट्रपति रामचन्द्र पौडेलले प्रतिनिधि सभा विघटन गर्दै आगामी फागुन २१ गतेका लागि निर्वाचन घोषणा गरेका छन् ।
२०७९ पुस २५ गते प्रतिनिधि सभाको दोस्रो कार्यकाल सुरु भएको थियो । त्यसयता २०८२ भदौ १९ गतेसम्म प्रतिनिधि सभाबाट २१ वटा विधेयक पारित भएका छन् । संघीय संसद् सचिवालयले दिएको जानकारी अनुसार एउटा विधेयक संघीय संसद्का दुवै सदनबाट पारित भए पनि राष्ट्रपतिबाट प्रमाणीकरण हुन बाँकी छ । नेपाल नागरिकता (दोस्रो संशोधन) विधेयक, २०८१ दुवै सदनबाट पारित भएर राष्ट्रिपतिबाट प्रमाणीकरण हुन बाँकी छ ।
२०८२ वैशाख १२ गतेबाट सुरु भएको प्रतिनिधि सभाको पछिल्लो अधिवेशनबाट बैंकिङ कसुर तथा सजाय (दोस्रो संशोधन) विधेयक २०८०, सहिद दशरथ चन्द स्वास्थ्य विज्ञान विश्वविद्यालय २०८०, विनियोजन विधेयक २०८२, राष्ट्र ऋण उठाउने विधेयक २०८२, आर्थिक विधेयक २०८२, केही नेपाल ऐनलाई संशोधन गर्न बनेको विधेयक २०८० पारित भएको छ ।
त्यस्तै अघिल्ला अधिवेशनहरूले सुशासन प्रवर्द्धन तथा सार्वजनिक सेवा प्रवाहसम्बन्धी केही नेपाल ऐनलाई संशोधन गर्ने विधेयक २०८१, आर्थिक तथा व्यावसायिक वातावरण सुधार र लगानी अभिवृद्धि सम्बन्धी केही नेपाल ऐनलाई संशोधन गर्न बनेको विधेयक २०८१, निजीकरण (पहिलो संशोधन) विधेयक २०८१, आर्थिक कार्यविधि तथा वित्तीय उत्तरदायित्व (पहिलो संशोधन) विधेयक २०८१, सहकारी सम्बन्धी केही नेपाल ऐनलाई संशोधन गर्ने विधेयक २०८१ पारित गरेका थिए । सरकारले ल्याएका अध्यादेशलाई प्रतिस्थापन गर्न यी विधेयक ल्याइएको थियो ।
यसबाहेक प्रतिनिधि सभाले २०८१ र २०८० को बजेटसम्बन्धी कानुन सहितका अन्य केही विधेयक परित गरेको थियो । जुन राष्ट्रपतिबाट प्रमाणीकरण भइसकेका छन् ।
