यू–२० च्याम्पियनसिपमा नेपालको लगातार दोस्रो जित, श्रीलंकामाथि १–० को शानदार विजय

चैत १२ — साफ यू–२० च्याम्पियनसिप अन्तर्गत नेपालले श्रीलंकालाई १–० गोल अन्तरले पराजित गर्दै प्रतियोगितामा लगातार दोस्रो जित हात पारेको छ।
माल्दिभ्सको मालेस्थित नेशनल स्टेडियममा हिजो सम्पन्न खेलमा नेपालको जितका लागि सुवास बमले निर्णायक गोल गरे। उनको एक मात्र गोल नै नेपालको जितका लागि पर्याप्त बन्यो।
यस जितसँगै नेपालले ६ अंक जोड्दै सेमिफाइनल प्रवेशको सम्भावना थप बलियो बनाएको छ। नेपालले यसअघि पहिलो खेलमा भुटानलाई २–१ गोलले हराएको थियो।
अब नेपालले आफ्नो तेस्रो खेलमा आयोजक माल्दिभ्ससँग प्रतिस्पर्धा गर्नेछ। समूह ‘ए’ मा नेपालसँगै माल्दिभ्स, भुटान र श्रीलंका रहेका छन् भने समूह ‘बी’ मा भारत, पाकिस्तान र बंगलादेश छन्।
राउन्ड रोबिन लिगपछि दुवै समूहका शीर्ष दुई टोली सेमिफाइनलमा प्रवेश गर्ने प्रावधान रहेको छ।