आजदेखि एन्फा राष्ट्रिय लिग फुटबल शुरू

३० पुस –झापा। अखिल नेपाल फुटबल संघ (एन्फा) को आयोजनामा आजदेखि राष्ट्रिय लिग फुटबल प्रतियोगिता शुरू हुँदैछ। प्रतियोगिताको उद्घाटन खेलमा काँक्रेविहार यूथ क्लब र फ्रेन्ड्स क्लब आमनेसामने हुनेछन्। खेल एन्फा कम्प्लेक्स, सातदोबाटो ललितपुरमा बिहान ११ बजे शुरू हुनेछ।
राष्ट्रिय लिगमा ए डिभिजनका १३ टोली र एन्फा प्रेसिडेन्ट लिगका चार टोली गरी कुल १७ टोली सहभागी छन्। सिंगल राउन्ड रोबिन प्रणालीमा सञ्चालन हुने प्रतियोगितामा जम्मा १ सय ३६ खेल खेलाइनेछन्।
एन्फाले सार्वजनिक गरेको खेलतालिका अनुसार आजै भगवती क्लब र चर्च ब्वाइज युनाइटेड क्लबबीच पनि प्रतिस्पर्धा हुनेछ। यो खेल दिउँसो ३ बजे शुरू हुनेछ।
राष्ट्रिय लिगका खेलहरू दशरथ रंगशाला, च्यासल रंगशाला तथा एन्फा कम्प्लेक्समा आयोजना हुनेछन्। प्रतियोगिताको विजेताले ५० लाख रुपैयाँ पुरस्कार प्राप्त गर्ने एन्फाले जनाएको छ।