साफ यू–१९ महिला फुटबल: नेपाल आज बंगलादेशसँग निर्णायक भिडन्तमा

माघ २१ – दक्षिण एसियाली खेलकुद महासंघ (साफ) यू–१९ महिला फुटबल प्रतियोगिताअन्तर्गत नेपालले आज बुधबार बलियो टोली बंगलादेशसँग प्रतिस्पर्धा गर्दैछ। पोखरा रंगशालामा पहिलो पटक आयोजना गरिएको प्रतियोगितामा नेपाल र बंगलादेशबीचको खेल दिउँसो ३ बजे सुरु हुनेछ।
आजै अर्को खेलमा भारत र भुटान आमनेसामने हुँदैछन्। ती दुई टोलीबीचको खेल मध्यान्ह १२ बजे सुरु हुनेछ।
चार टोली सहभागी प्रतियोगितामा बंगलादेश लगातार दुई जितसहित ६ अंक जोड्दै अङ्क तालिकाको शीर्ष स्थानमा छ। बंगलादेशले भुटानलाई १२–० को फराकिलो अन्तरले हराएको थियो भने भारतलाई २–० ले पराजित गरेको थियो।
नेपालले भने एक जित र एक हारसहित ३ अंक जोडेको छ। नेपाल पहिलो खेलमा भारतसँग १–० ले पराजित भएको थियो भने दोस्रो खेलमा भुटानलाई २–१ ले हराएको थियो। भारतको पनि नेपालजस्तै ३ अंक छ, जसले भुटानलाई हराएको र बंगलादेशसँग पराजित भएको थियो। दुई खेलमा पराजित भुटान भने अङ्कविहीन अवस्थामा छ।
फाइनल पुग्ने सम्भावना जीवित राख्न नेपाललाई आजको खेल जित्नै पर्ने दबाब छ। प्रतियोगिता माघ २४ गतेसम्म सञ्चालन हुनेछ।