झापा–५ मा बालेनको ऐतिहासिक जीत

फागुन २४ – राष्ट्रिय स्वतन्त्र पार्टी (रास्वपा) का वरिष्ठ नेता तथा काठमाडौँ महानगरपालिकाका पूर्वमेयर बालेन्द्र शाह (बालेन) ले झापा क्षेत्र नम्बर–५ बाट ऐतिहासिक जीत हासिल गर्नुभएको छ। नेकपा (एमाले) अध्यक्ष तथा पूर्वप्रधानमन्त्री केपी शर्मा ओलीको तीन दशक लामो राजनीतिक आधारलाई चुनौती दिँदै शाह भारी मतान्तरसहित विजयी हुनुभएको हो।
शाहले ६८ हजार ३४८ मत प्राप्त गर्दा उहाँका निकटतम प्रतिस्पर्धी ओलीले १८ हजार ७३४ मत ल्याउनुभएको छ। यससँगै शाहले ४९ हजार ६१४ मतान्तरले विजय हासिल गर्नुभएको हो।
निर्वाचन अधिकृतको कार्यालयका अनुसार उक्त क्षेत्रमा १ लाख ६३ हजार ३७९ मतदाता रहेकामा १ लाख ६ हजार ३७२ जनाले मतदान गरेका थिए। शाह यस पटक देशभर सबैभन्दा बढी मत ल्याएर विजयी हुने उम्मेदवारसमेत बन्नुभएको छ।
निर्वाचन परिणाम स्वीकार्दै अध्यक्ष ओलीले सामाजिक सञ्जालमार्फत शाहलाई बधाई दिँदै सफल कार्यकालको शुभकामना व्यक्त गर्नुभएको छ।
यस परिणामलाई मतदाताले परम्परागत दलभन्दा परिवर्तन र परिणाममुखी नेतृत्वप्रतिको विश्वासका रूपमा हेरेका छन्।