राष्ट्रियसभा सदस्यको शपथ सम्पन्न

फागुन २५,झापा – सङ्घीय संसद्को माथिल्लो सदन राष्ट्रियसभामा नवनिर्वाचित सदस्यहरूले आज शपथ लिनुभएको छ।
यही माघ ११ गते सम्पन्न राष्ट्रियसभा सदस्य निर्वाचनबाट निर्वाचित १८ जनामध्ये १७ जना सदस्यलाई राष्ट्रियसभाका अध्यक्ष नारायणप्रसाद दाहालले आज आयोजित कार्यक्रममा पद तथा गोपनीयताको शपथ गराउनुभएको हो।
शपथ लिने सदस्यहरूमा खम्मबहादुर खाती, गीता देवकोटा, चन्द्रबहादुर केसी, जगत तिमल्सिना, धर्मेन्द्र पासवान, प्रेमप्रसाद दङ्गाल, महन्थ ठाकुर, रञ्जित कर्ण, रामकुमारी झाँक्री, रेखाकुमारी झा, रोश्नी मेचे, ललितजङ्ग शाही, लिलाकुमारी भण्डारी, वासुदेव घिमिरे, सम्झना देवकोटा, सुनिलबहादुर थापा र सोमनाथ पोर्तेल रहनुभएको छ।
निर्वाचित सदस्य मीनासिंह रखाल भने आजको कार्यक्रममा अनुपस्थित रहनुभएको थियो।
संविधानअनुसार राष्ट्रियसभामा कुल ५९ सदस्य रहने व्यवस्था छ। सदस्यहरूको कार्यकाल ६ वर्षको हुने र प्रत्येक दुई वर्षमा एक तिहाइ सदस्यको पदावधि समाप्त हुने संवैधानिक प्रावधान रहेको छ।